वाईसीएल नेपालद्वारा बाराको कोल्हवीमा ‘श्रम तथा उत्पादन अभियान’ अन्तर्गत वृक्षारोपण

दिपेन्द्र जयसवाल बारा, साउन २४ गते।
योङ्ग कम्युनिस्ट लिग (वाईसीएल) नेपालले घोषणा गरेको दुई महिनाको ‘श्रम तथा उत्पादन अभियान’ बारा जिल्लाबाट औपचारिक रूपमा सुरु गरिएको छ । कोल्हबी नगरपालिका वडा नम्बर ९,मा रहेको  अरेम्बा बिर्ताबाट सुरु भएको अभियानअन्तर्गत २५ सय विरुवा रोपेर अभियानको रुपमा सुरुआत गरेको हो।
कार्यक्रम वाईसीएल बारा अध्यक्ष सिकेन्द्र कुसवाहाको अध्यक्षतामा सम्पन्न भएको थियो । कार्यक्रममा प्रमुख अतिथिका रूपमा नेकपा (माओवादी केन्द्र) का केन्द्रीय सदस्य तथा बारा इन्चार्ज अनिल श्रेष्ठ सहभागी थिए ।

श्रेष्ठले युवाको श्रम, सिर्जना र उत्पादनमा आधारित अभियानले समृद्धिको दिशामा देशलाई डोहोर्याउने विश्वास व्यक्त गरे। “सिर्जनशील श्रम, स्वावलम्बी जीवन र सामूहिक उत्पादनले मात्रै मुलुकको रूपान्तरण सम्भव छ,” उनले भने ।
कार्यक्रममा वाईसीएल मधेस प्रदेश इन्चार्ज देवसरण कानु, बारा इन्चार्ज रुकु पाख्रीन, केन्द्रीय सदस्य राजन पौडेल, प्रदेश सदस्यहरू रविराज दंगाल, तपेश्वर चौधरी, देवेन्द्र पराजुली र निजगढ नगर अध्यक्ष सन्तोष दंगाललगायतको उपस्थिति थियो ।
वक्ताहरूले श्रम र उत्पादनलाई राष्ट्रिय गौरवका रूपमा स्थापित गर्दै युवाहरूलाई रचनात्मक अभियानमा सक्रिय बनाउने आवश्यकता औंल्याए । उत्पादन र श्रमप्रतिको अवमूल्यन हटाई त्यसलाई सामाजिक परिवर्तनको आधार बनाउनुपर्नेमा उनीहरूको जोड थियो ।
अभियानअन्तर्गत वृक्षारोपण, सरसफाइ, सामुदायिक उत्पादनमा सहकार्यजस्ता कार्यक्रम सञ्चालन गरिने आयोजकहरूले बताएका छन्। स्थानीय स्तरमै रोजगारी सिर्जना, सामाजिक जागरण र युवाको सिर्जनात्मक क्षमतालाई संगठित गर्नु अभियानको मुख्य लक्ष्य रहेको छ ।
वाईसीएलले सुरु गरेको राष्ट्रिय अभियान आगामी दुई महिनासम्म विभिन्न जिल्लामा चरणबद्ध रूपमा सञ्चालन हुनेछ। यसले ग्रामीण क्षेत्रमा संगठन विस्तार, सामूहिक श्रम, कृषि तथा साना उद्यममा युवाको संलग्नता र वातावरण संरक्षणजस्ता विषयलाई प्राथमिकता दिने बताइएको छ ।
‘श्रम गरौं, उत्पादन बढाऔं, देश बनाऔं’ भन्ने नारासहित सुरु गरिएको अभियानलाई वाईसीएलले युवालाई रचनात्मक यात्रातर्फ डोर्याउने अवसरका रूपमा प्रस्तुत गरेको छ ।