रौतहटको राजपुरमा करेन्ट लागेर एक गर्भवती महिलाको मृत्यु

रौतहट, असार ४ गते २०८२।
रौतहटमा करेन्ट लागेर एक जना गर्भवती महिलाको मृत्यु भएको छ। सुत्ने कोठामा मोबाइल चार्ज गर्ने क्रममा करेन्ट प्रवाह भइ गर्भवती महिलाको मृत्यु प्रहरीले जनाएको छ ।

मृत्यु हुनेमा रौतहटको राजपुर नगरपालिका वडा नम्बर ३ डमार पोखरीया टोल निवासी शेख सफुलाको श्रीमती अन्दाजी वर्ष ३० को गुलनाज खातुन रहेको बताइएको छ। निज खातून सुत्ने कोठामा मोबाइल चार्ज गर्ने क्रममा करेन्ट लागेको जिल्ला प्रहरी कार्यालय रौतहटले जनाएको छ ।

बुधवार साँझ करिब साढे ४ बजेको समयमा करेन्ट लागेर घाइते भएकी गुलनाजलाई उपचारको लागि प्रादेशिक अस्पताल गौर ल्याइएको थियो। अस्पतालमा उपचार गर्ने क्रममा इसिजी गर्दा करिब ५ बजेको समयमा चिकित्सकले मृत घोषणा गरेको जिल्ला प्रहरी कार्यालय रौतहटका प्रवक्ता प्रहरी नायब उपरीक्षक दिपक कुमार रायले जानकारी दिनु भएको छ ।