गोविन्द चौधरीको दाबी- समुदाय, सहयात्री र जनताको साथ मेरो बलियो आधार

आरएन पटेल,रौतहट,माघ २६ गते ।
आगामी फाल्गुन २१ गते हुने प्रतिनिधि सभा निर्वाचनलाई लक्षित गर्दै रौतहट क्षेत्र नम्बर ३ बाट जनता समाजवादी पार्टी (जसपा) नेपालका प्रतिनिधि सभा सदस्य पदका उम्मेदवार गोविन्द चौधरी (छाता छाप) ले आज धरहरी, गोनाही र उचिडिह गाउँमा प्रचार-प्रसार तथा मतदाता भेटघाट कार्यक्रम गरेका छन।

भेटघाटका क्रममा स्थानीय मतदाताहरूले उम्मेदवार चौधरीलाई २०४८ सालको चुनाव आमछापदेखि नै चिनिरहेको बताउँदै उनको लामो राजनीतिक अनुभव र निरन्तर सक्रियतालाई स्मरण गरेका थिए । मतदातासँगको संवादमा उम्मेदवार चौधरीले कुनै पनि किसिमको लोभ-लालचमा नपर्न आग्रह गर्दै भने, “चुनाव नजिकिँदै जाँदा धेरै जना विभिन्न प्रलोभन लिएर आउन सक्छन्, तर त्यसमा नफस्नुहोस् ।”

उनले यसपटक जनताले वास्तविक परिवर्तन चाहेको उल्लेख गर्दै भने, “परिवर्तनको एक मात्र बलियो विकल्प मेरो उम्मेदवारी हो । मेरो जितका धेरै आधार छन- मेरो आफ्नै समुदायको पूर्ण साथ र समर्थन, लामो समयदेखि साथमा रहेका राजनीतिक सहयात्रीहरूको सहयोग, र तपाईं मतदाताहरूको विश्वास ।”
मतदाताहरूको साथ र सहयोग रहेमा यसपालि रौतहट-३ मा परिवर्तन निश्चित हुने दाबी गर्दै उम्मेदवार चौधरीले छाता छापमा मतदान गर्न अपिल गरेका छन ।