रौतहट-३ मा गोविन्द चौधरीको घरदैलो तीव्र, महम्मदपुरमा मतदाताको उत्साह

आरएन पटेल, रौतहट, फाल्गुन ०१ गते ।
राैतहट । आगामी फाल्गुन २१ गते हुने प्रतिनिधि सभा निर्वाचनलाई लक्षित गर्दै रौतहट क्षेत्र नम्बर ३ मा चुनावी गतिविधि तीव्र बनेको छ । यसैक्रममा जनता समाजवादी पार्टी (जसपा) नेपालका प्रतिनिधि सभा सदस्य पदका उम्मेदवार गोविन्द चौधरी (छाता छाप) ले आज गरूडा नगरपालिका–५ महम्मदपुरमा मतदाता भेटघाट तथा घरदैलो कार्यक्रम सम्पन्न गरेका छन् ।
मेयर प्रत्यासी अनिल यादवको नेतृत्वमा आयोजित घरदैलो कार्यक्रममा स्थानीय बासिन्दाको उल्लेखनीय सहभागिता देखिएको थियो । घरदैलोका क्रममा मतदाताहरूले “तपाईं चुनावमा नहुँदा हामी अलगअलग थियौं, तपाईं आएपछि फेरि एकजुट हुन थालेका छौं” भन्दै समर्थन व्यक्त गरेका थिए ।
कार्यक्रमलाई सम्बोधन गर्दै उम्मेदवार चौधरीले आफू ३५ वर्षअघि ‘आम छाप’ बाट चुनाव जितेको स्मरण गर्दै अहिले ‘छाता’ चुनाव चिन्ह लिएर जनताको सेवामा पुनः आएको बताए । “विगतमा जस्तै अहिले पनि जनताको भरोसा र एकताले नै जित सुनिश्चित गर्छ,” उनले भने ।
उक्त कार्यक्रममा जसपा नेपालका नेता चुल्हाई राय यादव सहित स्थानीय नेता तथा कार्यकर्ताहरूको उपस्थिति रहेको थियो ।
रौतहट–३ मा चौधरीको सक्रियता बढेसँगै चुनावी माहोल थप तातेको स्थानीयहरू बताउँछन ।