आज वसन्त पञ्चमी धूमधामले देवी सरस्वतीको पूजा आराधना गरिँदै।

स्थानीय न्यूज।
रौतहट।
माघ २१ गते।
प्रत्येक वर्ष माघ शुक्ल पञ्चमीका दिन मनाइने वसन्त पञ्चमी पर्व विद्याकी अधिष्ठात्री देवी सरस्वतीको पूजा आराधनासहित वसन्त पञ्चमी पर्व चारैतिर मनाइँदै छ।

यस अवसरमा आज बिहान जिल्लाको विभिन्न स्थान लगायत सम्पूर्ण शिक्षालय तथा सामुदायिक तथा निजी विद्यालयहरुमा देवी सरस्वतीको पूजा आराधना गरि वसन्त पञ्चमी पर्व चारैतिर मनाइँदै छ।
प्रत्येक वर्ष माघ शुक्ल पञ्चमीकै दिन मनाइने ‘श्रीपञ्चमी’ पर्व आज विद्याकी अधिष्ठात्री देवी सरस्वतीको देशभर निष्ठापूर्वक पूजा–आराधना गरी मनाइँछ। चन्द्रमाजस्तो गोरो वर्ण भएकी तथा हातमा वीणा र पुस्तक लिएकी विद्याकी देवी सरस्वतीलाई भक्तजनहरूले भारती, शारदा, हंसवाहिनी, जगन्माता, वागीश्वरी, कौमारी, वरदायिनी, बुद्धिदात्री, ब्रह्मचारिणी, चन्द्रघण्टा र भुवनेश्वरीजस्ता नामले पुकार्छन्।
विद्या र सिर्जनाकी देवी भएकाले विशेष गरी साहित्यकार, कलाकार, पत्रकार, शिक्षक र विद्यार्थी आआफ्ना कला–साधनाका वस्तु कलम, कापी, कुची र वाद्ययन्त्रलाई सरस्वतीका रूपमा पूजा–आराधना गर्छन् । सरस्वतीलाई तान्त्रिकहरूले तन्त्र सिद्धिका लागि तारादेवीका रूपमा मान्छन् ।
सूर्य उत्तरतिर लागी दिन लामो हुने र वसन्त ऋतु प्रारम्भ हुने विश्वासका साथ आजको दिनलाई ‘वसन्त पञ्चमी’ पनि भनिन्छ । ऋग्वेदमा वाग्देवीका नामले प्रसिद्धि पाएकी ब्रह्माकी अर्धाङ्गिनी ब्रह्मायणीको पूजा उपासनाले सबै प्रकारको ज्ञान, सिद्धि र सद्बुद्धि प्राप्त हुने उल्लेख छ । यसैकारणले सरस्वती पूजालाई ठूलो महत्व दिइन्छ । आजका दिन सरस्वतीको पूजा गरी विद्यारम्भ गरेमा सर्वसिद्धि प्राप्त हुन्छ भन्ने विश्वास छ ।
आजका दिन विवाह, व्रतबन्ध, गुफा राख्ने र बेलविवाह (इही) जस्ता सामाजिक तथा धार्मिक कार्य गर्न साइत हेर्नुपर्दैन भन्ने मान्यता छ । यस दिन बालबालिकालाई शिक्षारम्भ गराउने र नाक–कान छेड्न पनि शुभ मानिन्छ।
जिल्लाको सदरमुकाम गौर, गरुडा, चंद्रनिगाहपुर, कटहरिया, समनपुर, पिपराबजार, शिवनगर, मौलापुर, बंकूल लगायत अन्य जिल्लामा रहेका सरस्वतीका मन्दिरमा आज बिहानैदेखि पूजाआजा गर्न भक्तजन, खासगरी छात्रछात्राको घुइँचो लाग्ने गर्छ । सरस्वतीलाई चढाइएको सात गेडा अक्षता निलेमा विद्या र वुद्धि स्फुरण भई विद्यादेवीबाट चेतनाको ज्योति पाइन्छ भन्ने धार्मिक विश्वास छ । साथै वसन्त पञ्चमीको शुभ अवसरमा रौतहटको गरुडा नगरपालिका अन्तर्गत पर्ने शिवनगरधाममा मेला आयोजन हुने गर्दछ। दर्शनार्थीहरुको ठुलो आस्था र विश्वासको केन्द्र रहेको शिवमन्दिर शिवनगरमा ठुलो संख्यामा बोलबम कावरिया तथा शिवभक्तजनहरु मेला हेर्न तथा दर्शन गर्न आउने गर्दछन। आज बिहान ५ देखी नै मन्दिर परिसरमा दर्शनार्थीहरुको ठुलो भीड़ देखिएको छ।