मधेशमा आज श्रीकृष्ण जन्माष्टमी पर्व मनाइँदै

स्थानीय न्यूज                                                  रौतहट,साउन ३१ गते २०८२।
आज भगवान् श्रीकृष्ण जन्मेको दिन अर्थात् श्रीकृष्ण जन्माष्टमी, मधेशमा श्रीकृष्ण जन्माष्टमी पर्व हर्षोउल्लासका साथ मनाइँदैछ । प्रत्येक वर्ष भाद्र कृष्णपक्ष अष्टमीको दिन हिन्दु धर्मावलम्बीहरुले पूजा-आराधना गरेर श्रीकृष्ण जन्माष्टमी मनाउँछन् ।
भगवान श्रीकृष्णको जन्मोत्सवको अवसरमा मधेशका विभिन्न जिल्लाहरूमा आज श्रद्धा, भक्ति र उल्लासका साथ श्रीकृष्ण जन्माष्टमी पर्व मनाइँदैछ।
व्रत, पूजा, भजन-कीर्तन र झाँकी प्रदर्शनसहितका धार्मिक कार्यक्रमहरू आयोजना भइरहेका छन्। मन्दिरहरूमा बिहानदेखि नै भक्तजनहरूको घुइँचो लागेको छ। विशेषगरी रौतहट, सर्लाही, महोत्तरी, धनुषा, पर्सा, बारा लगायतका जिल्लाका प्रमुख कृष्ण मन्दिरहरूमा भक्तजनहरूले पूजा-अर्चना गर्दै भगवान श्रीकृष्णको आशीर्वाद लिइरहेका छन्।
पर्वको अवसरमा धार्मिक संस्थाहरूले भजन-कीर्तन, प्रवचन र रासलीला कार्यक्रम पनि गरिरहेका छन्। सुरक्षालाई मध्यनजर गर्दै स्थानीय प्रशासनले विशेष व्यवस्था गरेको छ।    हिन्दु धर्ममा भगवान् श्रीकृष्णको जन्म द्वापरयुगको अन्त्यतिर भाद्र कृष्ण अष्टमीको मध्यरातमा भएको विश्वास छ । श्रीकृष्णलाई भगवान् विष्णुको आठौं अवतार मानिन्छ। धर्मशास्त्रहरूमा दुर्जनको विनाश र सज्जनको रक्षाका लागि श्रीकृष्णको जन्म भएको उल्लेख छ ।
कंसको अत्याचारबाट मानव जातिलाई मुक्ति दिलाउन पिता वासुदेव र माता देवकीको आठौं गर्भबाट भगवान् श्रीकृष्णको जन्म भएको थियो । मुलुकभरका कृष्ण मन्दिरहरूमा बिहानैदेखि भक्तजनको भीड लागेको छ । मध्यरातमा श्रीकृष्णको धातुको प्रतिमालाई स्नान गराउने परम्परा छ ।
श्रीकृष्णलाई धर्म, नीति, भक्ती र न्यायको प्रतीकका रूपमा पूजिन्छ।
श्रीकृष्णको पूजाआजा गरेमा लामो आयु प्राप्त हुने, सन्तान प्राप्ति हुने र मनोकामना पूरा हुने जनविश्वास छ।